Jackson EKKI genginn út

Talsmaður Michael Jacksons hefur borið til baka sögusagnir um að söngvarinn sé genginn út. „Þrátt fyrir þrálátan orðróm um að Jackson hafi gengið að eiga barnfóstru barna sinna, Grace Rwaramba, get ég staðfest að hann er ekki á rökum reistur," segir Rayone Bain, talsmaður söngvarans, í samtali við Access Hollywood. „Gögn sem hafa verið birt og eiga að gefa til kynna að hjónaband sé að ræða eru fölsuð."

Orðrómur um að Jackson og Rwaramba hafi gengið að eiga hvort annað í Las Vegas byrjaði að spyrjast út í byrjun ársins og á dögunum birti slúðurblaðsins National Enquirer gögn sem áttu að staðfesta að Jackson væri kvæntur. Samkvæmt Bain eru þau fölsuð.

Þetta er ekki í fyrsta skipti sem orðrómur af þessu tagi fer af stað en í október á síðasta ári voru einnig uppi getgátur um að Jackson hafi gengið að eiga barnfóstruna.