Vilja að veiðigjald verði fellt niður vegna kvótaskerðingar

Störfum í fiskvinnslu fækkar um allt að 600 um allt land á næstu mánuðum vegna skerðingar þorskkvótans segir formaður Samtaka fiskvinnslustöðva. Hann segir samtökin vilja að veiðigjald verði fellt niður til að bregðast við kvótaskerðingunni.

Tæplega hundrað starfsmönnum í landvinnslu var sagt upp hjá fyrirtækjunum Eskju á Eskifirði og Humarvinnslunni í Þorlákshöfn í gær. Bæði fyrirtækin segja uppsagnirnar afleiðingu vegna skerðingar þorskkvótans í sumar.

Arnar Sigurmundsson, formaður samtaka fiskvinnslustöðva, segir uppsagnirnar ekki hafa komið á óvart og þær hafi legið í loftinu lengi. Enn fleiri séu framundan.

Arnar segir að styrkist krónan á næstu misserum verði það ekki minna högg fyrir sjávarútveginn. Aðalfundur Samtaka fiskvinnslustöðva stendur nú yfir á Grand hóteli og segir Arnar að fundurinn komi með tillögur til að bregðast við ástandinu.