Áfram dregur úr vöruskiptahalla

Vöruskiptahallinn reyndist 66,5 milljarðar króna á fyrstu átta mánuðum ársins samkvæmt tölum Hagstofunnar. Það er mun minni halli en á sama tíma í fyrra en þá reyndist hann nærrri 104 milljarðar. Vöruskiptajöfnuðurinn var því rúmum 37 milljörðum króna hagstæðari en á sama tíma árið áður. Fluttar voru út vörur fyrir tæpa 177 milljarða króna en inn fyrir tæpa 243 á fyrstu átta mánuðum þessa árs.

Þegar aðeins er horft til ágústmánaðar voru vöruskiptin neikvæð um tólf milljarða króna en í sama mánuði í fyrra reyndust þau neikvæð um 14 milljarða.

Þegar nánar er rýnt í úflutning fyrstu átta mánuði þessa árs kemur í ljós að verðmæti hans var nærri 22 milljörðum króna eða 14 prósentum meiri en á sama tíma árið áður. Sjávarafurðir voru 47 prósent alls útflutnings og var verðmæti þeirra tveimur prósentum meira en á sama tíma árið áður. Útfluttar iðnaðarvörur voru 43 prósent alls útflutnings og var verðmæti þeirra þriðjunga meira en árið áður. Aukningu útflutnings má einna helst rekja til aukins álútflutnings.

Fyrstu átta mánuði ársins var verðmæti vöruinnflutnings hins vegar nærri 16 milljörðum eða sex prósentum minni en á sama tímabili í fyrra. Mestur varð samdráttur í innflutningi á flugvélum og fjárfestingarvöru en á móti kom aukning í innflutningi á mat- og drykkjarvöru og annarri neysluvöru.