Níræður faðir vill fleiri börn

Elsti faðir heims stendur heldur betur undir nafni og hefur nú eignast sitt 21. barn, níræður að aldri.

Indverski bóndinn Nanu Ram Jogi er orðinn 90 ára gamall en er frjósamur sem aldrei fyrr. Hann er skráður í heimsmetabók Guinnes sem elsti pabbi í heimi og fyrir tveimur vikum sló Jogi sitt eigið heimsmet þegar hann eignaðist sitt 21. barn á lífsleiðinni, dótturina Girija Rajkumari. Jogi eignaðist dótturina með sinni fjórðu eiginkonu og hefur í hyggju að halda áfram að eignast börn þar til hann verður 100 ára.

„Konur elska mig,“ segir Jogi. „Ég vill eignast fleiri börn. Ég er við hestaheilsu og get lifað nokkra áratugi til viðbótar. Ég vill eignast börn allavega þar til ég verð 100 ára - þá hætti ég kannski,“ segir hann.

Jogi segist ekki vita með fullri vissu hversu mörg börn hann eigi og er allt eins líklegt að þau séu fleiri en þau 21 sem vitað er um með fullri vissu, tólf syni og níu dætur. Þá á Jogi 20 barnabörn og sjö barnabarnabörn.

Spurður um hvernig hann viðhaldi frjóseminni segir Jogi að mikið kjötát sé lykilatriði. „Ég borða allar tegundir af kjöti, lömb, kanínur, kjúklinga, naut og önnur villt dýr. Svo fer ég í góðan göngutúr á hverjum degi.“

Jogi eignaðist sitt fyrsta barn árið 1943 og hefur bætt jafnt og þétt í sarpinn síðan þá. Núverandi eiginkona hans, Saburi, var eitt sinn gift elsta syni hans, Shiv Lal, sem lést fyrir 10 árum síðan. „Þegar maðurinn minn lést lofaði Jogi að hugsa um mig og nú eigum við sjö börn. Ég er mjög hamingjusöm,“ segir Saburi. Sjálfur segist Jogi lifa hinu fullkomna lífi. „Öll þessi börn og barnabörn halda mér ungum.“