Þingmaður Framsóknarflokks ræðst harkalega að forystu flokksins

Kristinn H. Gunnarsson þingmaður Framsóknarflokksins ræðst harkalega á forystu flokksins á vefsíðu sinni í dag og sakar hana um sýndarlýðræði. Yfirþyrmandi samansafn helstu valdamanna flokksins hafi lýst stuðningi við Björn Inga Hrafnsson, aðstoðarmann forsætisráðherra og frambjóðanda í forystusætið í Reykjavík.

Kristinn segir frambjóðandann einn nánasta samstarfsmann formanns flokksins. Þangað sæki hann pólitískan styrk og áhrif. Yfirlýstir stuðningsmenn hans séu helstu valdamenn flokksins. Þeir sem vilji styðja aðra frambjóðendur til forystu í Reykjavík, svo sem Önnu Kristinsdóttur eða Óskar Bergsson, þurfi þar með að ganga gegn vilja valdamikilla manna í flokknum. Hér séu menn komnir út fyrir öll eðlileg mörk.

Framboð Björns Inga kom einnig upp í fyrirspurnartíma á Alþingi í dag þegar þingmaður frjálsynda flokksins vildi vita hvað liði samræmdum reglum um fjármál stjórnmálaflokka, en þverpólitísk nefnd um efnið átti að skila um áramót en hefur enn ekki gert það.