Tillögur um milljarða útgjaldaaukningu

Stjórnarandstaðan leggur til að rúmum sjö milljöðrum króna verði varið til að bæta hag elli- og örorkulífeyrisþega, við aðra umræðu fjárlaga sem hófst á Alþingi í dag. Stjórnarmeirihlutinn leggur einnig til að útgjöld verði aukin verulega á næsta ári en fjármálaráðherra segir engu að síður ekki hægt að tala um kosningafjárlög.

Tekjur ríkissjóðs halda áfram að aukast og nú er gert ráð fyrir að þær verði rúmlega þremur milljörðum meiri á næsta ári en gert var ráð fyrir þegar fjárlagafrumvarpið var lagt fram í haust, eða 376,4 milljarðar króna. Það er við aðra umræðu fjárlaga sem tillögur eru lagaðr fram um breytingar og í morgun kynnti stjórnarandstaðan sameignlegar tillögur Samfylkingarinnar, Vinstri grænna og Frjálslynda flokksins.

Nú þegar sex mánuðir eru til kosninga takast stjórn og stjórnarandstaða á um síðustu fjárlög Alþingis fyrir kosningarnar í vor. Báðir aðilar leggja til aukin útgjöld, samanlagt upp á um 17 þúsund milljónir króna.

Stjórnarandstaðan leggur til að elli - og örorkulífeyrisþegar geti þénað 900 þúsund krónur á ári án þess að bætur þeirra skerðist, en stjórnarliðar vilja að frítekjumarkið verði 300 þúsund. Þá vill stjórnarandstaðan að tekjutrygging ellilífeyrisþega verði 85 þúsund og örorkulífeyrisþega 86 þúsund, tengsl lífeyrisgreiðslna við tekjur maka verði afnumin, vasapeningar þeirra sem búa á stofnunum verði hækkðir um 50 prósent, sem og frítekjumark sem fari í 75 þúsund krónur á mánuði. Þá vill stjórnarandstaðan að öryrkjar haldi aldurstengdri örorkuuppbóta við töku ellilífeyris að tekjur skerði tekjutryggingu um 35 prósent í stað 45 prósenta.

Katrín Júlíusdóttir, fulltrúi Samfylkingarinnar í fjárlaganefnd Alþingis, var talsmaður stjórnarandstöðunnar á sameiginlegum fréttamannafundi hennar í dag. Katrín segir kjarnan í tillögum stjórnarandstöðunnar verða að bæta hag elli - og örorkulífeyrisþega, en tillögurnar kosta rúmelga sjö milljarða.

Á móti leggur stjórnarandstaðan til að tekjur ríkissjóðs verði auknar um rúma fimm milljarða og munar þar mest um skatta á tekjur og hagnað. Árni Mathiesen, fjármálaráðherra, segir jákvætt að stjórnarandstaðan leggi sameiginlega fram tillögur, en telur ekki líklegt að þær nái fram að ganga við afgreiðslu fjárlaga.

Í tillögum stjórnarliða er útgjaldaaukning upp á 9,5 milljarða og ýmsar aðrar tilfærslur sem þýða að afgangur á fjárlögum verður 8,9 milljarðar í stað 15 eins og fjárlagafrumvarpið frá því í haust gerði ráð fyrir. Fjármálaráðherra segir stærstu fjárhæðirnar fara til menntamála og Landsspítalans háskólasjúkrahúss og þær hefðu ratað þangað hvort sem kosningar væru framundan eða ekki.