Laun æðstu embættismanna hækka í október og um áramót

Kjararáð hefur ákveðið að laun þeirra sem heyra undir ráðið, þar meðal þingmenn, ráðherrar, forseti og dómarar, skuli hækka um 3,6 prósent afturvirkt frá 1. október 2006. Þá skuli þau hækka um 2,9 prósent um áramót. Úrskurður þar að lútandi var kveðinn upp í gær.

Kjararáð tók við af Kjaradómi og kjaranefnd sem áður kváðu upp úrskurði um laun og starfskjör þjóðkjörinna manna, ráðherra og dómara og annarra ríkisstarfsmanna sem svo er háttað um að þau geta ekki ráðist með samningum á venjulegan hátt vegna eðlis starfanna eða samningsstöðu.

Bent er á í úrskurði Kjararáðs að um áramótin hækki laun samkvæmt kjarasamningum um 2,9 prósent hjá flestum. Þá hafi ráðið kannað þróun launa á árinu sem er að líða og komist að því að lágmarkshækkun samkvæmt kjarasamningum var 5,5 prósent en af launavísitölum Hagstofu Íslands sést að laun að meðaltali hafi hækkað mun meira, bæði vegna kjarasamninga og launaskriðs. Síðasta launavísitala hafi hækkað um 11 prósent næstu tólf mánuði á undan.

Á sama tíma hafi laun embættismanna og þjóðkjörinna fulltrúa sem heyra undir kjararáð hækkað um tæplega 5,6 prósent, 2,5 prósent 1. janúar og um 3 prósent 1. júlí samkvæmt úrskurði kjararáðs hinn 4. október. Bent er á að ákvarðanir kjararáðs sem leiða af hækkunum sem ekki verða beint lesnar úr kjarasamningum, svo sem hækkanir um launaflokka og launaskrið af öðrum ástæðum, komi ætíð eftir á og stafi af breytingum sem þegar hafi verið gerðar annars staðar.

Af þessum sökum og vegna þess hve launahækkanir hafi verið miklar að undanförnu er það niðurstaða kjararáðs að nauðsynlegt sé að launahækkun til þeirra sem undir ráðið heyra verði skipt í tvennt; annars vegar til þess að taka mið af þeim launabreytingum sem orðið hafa á vinnumarkaði fram til septembermánaðar 2006, umfram þá hækkun sem fólst í úrskurði kjararáðs 4. október, og hins vegar vegna almennrar launahækkunar sem samið hefur verið um 1. janúar 2007.