Michael Jackson kærður á ný

Michael Jackson hefur verið kærður af fyrrum samstarfsmanni sínum fyrir ógreidd laun. Marc Schaffel vann að lagi með söngvaranum sem gert var í góðgerðarskyni en það var aldrei gefið út. Auk þess gerði Schaffel tvær heimildamyndir sem ætlað var að sýna Jackson í góðu ljósi í kjölfar hinnar umdeildu bresku myndar Living with Michael Jackson.

Schaffel heldur því fram að hann hafi ekki fengið greitt fyrir verkin sem hann vann fyrir Jackson og ýmis útgjöld og lán sem þeim fylgdu. Michael Jackson lagði þá fram gagnákæru á hendur Schaffel og sakaði hann um að hirða málverk og skúlptúra að andvirði 250.000 dollarar. Mikil óreiða er á bókhaldi Jacksons og veldur það vandræðum í málinu. Jackson býr nú í furstadæminu Bahrain en upptaka með vitnisburði hans var sýnd í réttarsalnum á fimmtudag. "Ég er viss um að hann fékk peninginn," sagði Jackson í samtali við lögmann Shaffel. Aðspurður hvernig hann gæti verið svo viss um þetta, svaraði Jackson: "Af því að hann virtist alltaf svo hamingjusamur." Lögmaðurinn svaraði þá hnyttinn: "Maður getur ekki keypt hamingju með peningum."