Lögreglan fangelsar nakinn mann

Lögreglan í Reykjavík færði karlmann á þrítugsaldri í fangageymslu í gær. Sá hafði gengið um nakinn í miðborginni. Lögreglan tók manninn um níu leytið í gærmorgun á Lokastígnum en þegar hún kom á staðinn var hann á sokkunum einum klæða.

Lögreglan segir ennfremur frá því á vef sínum, að svo virðist sem einhverjir hafi ekki verið í neinu jólaskapi undanfarna daga því lögreglunni í Reykjavík bárust nokkrar tilkynningar um skemmdarverk. Ein þeirra var vegna nokkurra krakka sem höfðu skemmt jólaskreytingar í úthverfi. Skemmdarvargarnir eru nánast á unglingsaldri og eiga því að vita betur en fólkið sem varð fyrir barðinu á skemmdarfýsn þeirra varð eðlilega reitt og svekkt. Enda hafði það lagt töluvert á sig til að skreyta og lýsa upp í skammdeginu. Í öðru hverfi borgarinnar sprengdu óprúttnir aðilar flugelda í fjölbýlishúsi. Þar brotnuðu þrjár rúður og fyrir liggur að mála þarf sameign hússins upp á nýtt.

Þá sinnti lögreglan allmörgum útköllum sem bárust vegna hávaða í heimahúsum því ekki voru allir sem héldu jólin í ró og næði. Í flestum tilfellum var um ræða fólk sem hafði drukkið ótæpilega.