Fimm flugvélar fóru til Akureyrar eftir hádegið

Fimm flugvélar frá Flugfélagi Íslands hafa farið eftir hádegið til Akureyrar og því hafa um 250 manns sem beðið hafa eftir flugi þangað komist á áfangastað. Enn bíða þó á annað hundrað manns eftir flugi til Akureyrar og vonast forsvarsmenn fyrirtækisins eftir því að geta komið þeim öllum þangað í dag en veðurútlitið er ágætt.

Hins vegar hefur ekki verið flogið til Ísafjarðar í dag vegna slæms veðurs en rúmlega 50 manns bíða eftir flugi þangað. Þrjár vélar flugu til Egilsstaða í morgun og þá fór ein vél til Vestmannaeyja. Auk þessa hefur verið seinkun á millilandaflugi, allt frá fimmtán mínútum og upp í nokkra klukkutíma, en það má rekja til vonskuveðursins og tafa undanfarna dag.