Björgunarsveitarmenn önnum kafnir á suðvesturhorninu

Björgunarsveitarmenn Landsbjargar eru nú í nokkrum óveðursútköllum á suðvesturhorninu. Í Þorlákshöfn voru þakplötur farnar að fjúka af fiskimjölsverksmiðju. Þá er stór skemma í byggingu í Keflavík en sú nýbygging er að liðast í sundur og er allt tiltækt lið frá Björgunarsveitinni Suðurnes að vinna í því verkefni.

Björgunarsveitin Mannbjörg frá Þorlákshöfn er núna að festa þakplötur á Fiskimjölsverksmiðju við höfnina í Þorlákshöfn. Fiskimjölsverksmiðjan er í eigu Hólmarastar á Stokkeyri. Einnig er hluti sveitarinnar í ýmsum verkefnum, m.a. að færa fæði til búfénaðar sem ekki næst til nema á bátum. Ekki er gott að lýsa ástandinu með orðum en Ásgeir Guðmundsson, formaður Mannbjargar sagði að hann hefði aldrei áður lent í því að fullmannaður gúmmíbjörgunarbátur með utanborðsmótor hefði farið fram úr honum á vegi, eins og gerðist fyrr í dag á veginum sem liggur frá Björnskoti á Skeiðum.

Í Keflavík er stór skemma, sem er í byggingu að liðast í sundur. Hún er staðsett í nýja iðnaðarhverfinu úti á bergi. Allt tiltækt lið frá Björgunarsveitinni Suðurnes hefur verið kallað út vegna þessa. Eins hefur Björgunarsveitin Þorbjörn í Grindavík verið kölluð að nýbyggingum ofarlega í bænum til að koma í veg fyrir tjón af völdum foks. Að sögn heimamanna eru aðstæður þar gífurlega erfiðar, veður slæmt og miklar vindhviður.