Millilandaflug lamast ekki þrátt fyrir skort á flugumferðarstjórum

Forstjóri Flugstoða segir að millilandaflug muni ekki lamast þótt um sextíu flugumferðarstjórar hafi ekki nýtt lokafrest til að ráða sig hjá fyrirtækinu, sem tekur til starfa um áramótin. Til greina kemur að ráða flugumferðarstjóra erlendis frá ef á þarf að halda.

Enginn þeirra tæplega sextíu flugumferðarstjóra sem ekki hefur gert samning við Flugstoðir ohf. um störf hjá fyrirtækinu eftir að það tekur við flugstjórn á Íslandi um áramót, sótti um starf þegar ítrekað framlengdur frestur til þess rann út klukkan tvö í dag. Félag íslenskra flugumferðarstjóra þrýstir á að gerður verði nýr kjarasamningur milli félagins og Flugstoða. Þá vilja þeir að lífeyrisréttindi flugumferðarstjóra verði þau sömu og þau eru nú hjá ríkinu. Forráðmenn Flugstoða telja kjarasamning vera í gildi og vilja ekki taka þá upp, en segjast hafa gefið út þá yfirklýsingu að lífeyrisréttindin verði tryggð.

Þorgeir Pálsson, forstjóri Flugstoða, segir stjórn félagsins ítrekað hafa lýst því yfir skriflega að lífeyrisréttindi starfsmanna verði tryggð. Það hafi einnig verið boðið upp á að gera samkomulag við flugumferðarstjóra um hvernig þetta loforð yrði framkvæmt. Þannig að lífeyrissjóðsmálið væri ekki alvöru deilumál.

Loftur Jóhannsson, formaður Félags íslenskra flugumferðarstjóra, segir að yfirlýsingar dugi ekki. Ef það væri nóg að atvinnurekendur gæfu út yfirlýsingar um kjör fólks, þá þyrfti hvorki samninga né stéttarfélög. En það væri auðvitað ekki raunin.

Á bilinu þrjú til fimm þúsund manns fljúga daglega til og frá landinu og þessi deila setur ferðalög þessa fólks í óvissu strax um áramótin. En flugturninn á Keflavíkurflugvelli verður fullmannaður. Loftur segir að það eigi eftir að vera erfitt að halda uppi eðlilegri flugumferð þegar vanti um 60 flugumferðarstjóra.

Gripið verður til viðbragðsáætlunar hjá Flugstoðum, að sögn Þorgeirs. Það þýði að þjónustustigið verði með öðrum hætti en venjulega, en landið lokist ekki og flugsamgöngum verði haldið uppi. Hann vill ekki útiloka að útlendingar verði ráðnir til starfa í flugstjórnarmiðstöðinni, fáist Íslendingar ekki til þess. En það tekur allt frá nokkrum vikum upp í nokkra mánuði að þjálfa menn til starfa hér, allt eftir því hvaða reynslu þeir hafa af stjórnun úthafsflugs.