Lítill munur á slysatíðni á 3ja og 4ra akreina vegum

Háværar kröfur eru um tvöföldun Suðurlandsvegar milli Reykjavíkur og Selfoss, eins og gert var við Reykjanesbraut, en því hafnað að öryggið verði bætt með þriggja akreina vegi, eins og í Svínahrauni. Um Reykjanesbraut aka nú liðlega níu þúsund bílar á sólarhring, um Vesturlandsveg á Kjalarnesi um 6.400 en um Suðurlandsveg á Hellisheiði rúmlega 6.000 bílar. Ef aðeins er horft á afkastagetu dugar 1+1 vegur öllum þessum leiðum en hann afkastar 10 til 12 þúsund bílum á sólarhring. Tveir plús einn vegur dugar allt að tuttugu þúsund bíla umferð en tveir plús tveir er ætlaður allt að 60 þúsund bíla umferð, tífalt meiri en fer um Hellisheiði. Samkvæmt tölum sem samgönguráðherra hefur kynnt, lækkar slysatíðni miðað við 100 niður í 55 við að fara í þrefaldan veg en niður í 45 við að fara í fjórfaldan veg. Munur á slysatíðni er því um tíu prósent, milli þessara tveggja lausna. Vegamálastjóri áætlar að þriggja akreina lausn milli Rauðavatns og Selfoss kosti 3-5 milljarða króna en fjögurra akreina 7 til 12 milljarða. Þær 700 milljónir króna, sem nú eru á vegaáætlun í þessu skyni, duga því skammt. Ef tíu milljarðar króna fengjust í verkefni af þessu tagi má hins vegar spyrja hvort skynsamlegt væri að setja þá alla í fjórföldun þegar þriggja akreina lausn gæti nýst til að bæta öryggi á jafnvel þrefalt lengri vegalengd. Tíu milljarðar króna gætu þannig með þriggja akreina lausn dugað til að stórbæta umferðaröryggi út frá Reykjavík bæði til Selfoss og Borgarness, en aðeins til Selfoss, ef fjögurra akreina lausn yrði valin. Og lausnirnar eru misdýrar. Sú fjögurra akreina lausn, sem samgönguráðherra kynnti nýlega á fundi, gerir ráð fyrir að með sama hætti og á þriggja akreina vegi, yrði skilið á milli akreina með víravegriði, en ekki höfð breið umferðareyja á milli, eins og á Reykjanesbraut. Þessi lausn á fjögurra akreina vegi yrði, samkvæmt tölum vegamálastjóra, mun ódýrari og aðeins 60 til 70 prósent dýrari en þriggja akreina vegur.