Áfengi gæti hækkað í verði um allt að 23 %

Áfengi mun hækka í verði á bilinu fjögur komma þrjú til tuttugu og þrjú prósent með fyrirhugaðri breytingu á áfengisgjaldi og virðisaukaskatti. Mesta hækkunin á bjór, samkvæmt útreikningum birgja, verður rúmlega 21 prósent.

Um leið og ríkissjóður lækkar virðisaukaskatt á matvæli í mars á næsta ári, hækkar svo kallað áfengisgjald. En áfengisgjaldið er fast gjald sem lagt er á í þremur flokkum, bjór, léttvíni og sterku áfengi. Gjaldið byrjar að reiknast þegar vínandamagn fer yfir 2,25 prósent. Hver flokkur hefur síðan krónutölu sem margföldunarstuðul sem margfaldast með vínanda styrkleikanum, og það eru þessir stuðlar sem ríkisstjórnin vill hækka um 60 prósent. En þá lítur dæmið t.d. svona út hvað bjórinn varðar.

Ef tekið er dæmi af 5,6 prósent sterkum bjór, þá mun kassinn af honum hækka um 888 krónur, sem þýðir að dósunum í kassanum fækkar í raun um fjórar, miðað við núverandi verð.

Ef þetta verður raunin er ríkið að taka til sín mun meira af verði hvers bjórs. Höldum okkur við dæmið af bjórnum hér að framan. Í dag er útsöluverð hans 223 krónur, álagning ÁTVR, virðisaukaskattur, áfengisgjald og skilagjald er samanlagt 170,84 krónur. En skoðum nú hvernig bjórdósin lítur út ef frumvarpið verður að lögum. Þá verður útsöluverðið 261 króna og ríkið tekur til sín 209 krónur af útsöluverði þessa bjórs. Í dag er hlutur ríkisins 76,6 prósent, en eftir breytingu yrði hlutur ríkisins í dósinni 80 prósent.

Það sama er upp á teningnum hvað varðar sterkt áfengi. Flaska af 37,5 prósent sterkum Vodka sem kostar í dag 3.090 krónur, mun eftir breytinguna kosta 3.800 krónur. Hækkunin er 23 prósent.

Verð á léttu víni mun líka hækka ef frumvarpið nær fram að ganga óbreytt. Og vegna þess að áfengisgjaldið miðast eingöngu við styrkleika áfengis, en ekki gæði þess, mun ódýrasta vínið hækka mest. Samkvæmt upplýsingum sem fréttastofan hefur frá birgjum, mun léttvín að meðaltali hækka um 10% í verði en dæmi verða um léttvín sem myndi hækka um allt að 20 prósent.

Flestum þykir gaman að fara út að borða og fá sér góðan mat og gleðjast væntanlega yfir lækkun virðisaukaskatts á matvæli. Það er hins vegar hætt við því að bindindismenn einir gleðjist þegar kemur að því að greiða reikninginn.