Tugum fugla fargað

Nær öllum fuglum í í Fjölskyldu- og húsdýragarðinum í Reykjavík var fargað í morgun og matargjöfum til hundruð villtra fugla hætt. Tveir dýralæknar fóru um garðinn og á sjöunda tug fasana, dúfna, hænsna, anda og gæsa var gefin dauðsprauta.

Ástæðan er sú að tekin voru sýni úr tíu landnámshænum og reyndust fjögur vera jákvæð vegna mótefna gegn vægum tegundum af fluglaflensu af H5 stofni. Afbrigðið er ekki hættulegt mönnum og engin merki hafi verið um veikindi í fuglunum taldi en þó taldi Landbúnaðarstofnun nauðsynlegt að brugðist væri við með því að aflífa fuglana og varð landbúnaðarráðherra við þeirri tillögu.

Alþjóða dýraheilbirgðisstofnunin hefur lagt til að fuglum þar sem H5 stofni finnist verði fargað. Það dugði því ekki til að aflífa hænurnar fjórar sem mældust með mótefni og fylgjast með smiti í öðrum fuglum að sögn yfirdýralæknis.

Formaður Haughænufélagsins segist hins vegar ekki sjá neinar skynsamlegar aðgerðir fyrir svo dramatískum aðgerðum, en mikið hefur verið lagt í það síðustu ár að koma upp stofni landnámshænsna hér.

Það sem eftir er af fuglum eru tveir fálkar og haförn, sem hafa verið vistaðir í garðinum.

Einnig á að reyna að flæma alla villta fugla í burt af svæðinu næstu þrjá mánuði vegna hugsanlegrar smithættu og hefur matargjöfum til þeirra verið hætt. Fuglarnir virtust þó ekkert skilja í þessari meðferð á sér og bæði dúfur og gæsir gengu í halarófu á eftir öllu því mannfólki sem kom í garðinn í von um að einhver myndi gauka að þeim bita. Talið er að á milli fjögur og fimmhundruð villtir fuglar leiti daglega í æti og skjól í garðinum.