Norsk Hydro lýsir áhuga á að reisa álver á Íslandi

Skrifstofan hefur þegar verið opnuð og er til húsa að Smiðshöfða 1. Helstu forystumenn álframleiðslu fyrirtæksins er staddir á Íslandi og áttu þeir fund með Jóni Sigurðssyni iðnaðarráðherra í morgun. Í hádeginu héldu þeir svo fréttamannafund og þar var auðheyrt að þeir sáu eftir því að hafa ekki getað nýtt tækifærið sem þeim bauðst til að byggja álverið á Reyðarfirði.

Torstein Dale Sjøtveit, forstjóri Hydro Aluminium Metal, segir að fyrirtækið hafi því miður þurft að velja á milli tveggja verkefna árið 2002 og því ekki getað farið í álversframkvæmdir á Austfjörðum. Nú hyggist fyrirtækið reisa ný álver og vilji aftur skoða möguleika til slíks á Íslandi.

Hydro er þegar með talsverð tengsl við Ísland en það sér álveri Norðuráls fyrir tæknibúnaði og kemur að tilraunaverkefninu með rekstur vetnisstrætisvagna. Þá hefur Hydro mikinn áhuga á djúpborunarverkefninu sem er að hefjast hérlendis. Megináhuginn snýr þó að því að afla orku til álframleiðslu en Hydro-menn spá því að tvöfalda þurfi heimsframleiðslu áls á næstu fjórtán árum til að anna eftirspurn.

Thorstein Dale Sjötveit segir að Hydro sé orkufyrirtæki sem hafi upphaflega verið stofnað um vatnsorku og það hafi áhuga á allri orkuframleiðslu. Álframleiðsla sé ein leið til að flytja orku og Hydro telji hana henta vel fyrir Ísland til þess að flytja út orku til annarra heimhluta.