Missir réttinn til sjúkradagpeninga

Fólk sem skiptir um vinnu og fer frá stéttarfélögum hins opinbera til stéttarfélaga hins almenna markaðar eða öfugt missir rétt sinn til sjúkradagpeninga og lendir því oft í fjárskorti ef það veikist á fyrstu dögum í nýrri vinnu. Formaður BSRB segir kerfið einfaldlega vanþróað, eðlilegt væri að sjúkrasjóðir hefðu samstarf sín á milli, allavega um lágmarksréttindi.

Frítökuréttur vegna veikinda sem fólk vinnur sér inn hjá vinnuveitanda erfist að öllu jöfnu ekki á milli vinnustaða þannig að þegar fólk skiptir um vinnustað þarf það að byrja upp á nýtt að safna upp veikindarétti. Fólk sem ekki hefur veikindarétt eða hefur klárað hann hjá vinnuveitenda sínum getur leitað til stéttarfélags sem það hefur borgað í og fengið bætur úr sjúkrasjóði eða sjúkradagpeninga.

Ef starfsmaður hefur hins vegar skipt um vinnu milli opinbera og almenna geirans á hann ekki einu sinni rétt á að sækja í sjúkrasjóð nýja stéttarfélagsins fyrr en hann er búinn að vinna sér inn réttindi á nýja staðnum. Þess eru dæmi að fólk sem veikist á fyrstu dögunum í nýju starfi fái því reglum samkvæmt hvorki neina fjárhagsaðstoð frá vinnuveitenda eða stéttarfélagi og það eina sem fólk hafi að að hverfa séu 30 þúsund króna sjúkradagpeningar Tryggingastofnunar á mánuði.

Formaður SFR viðurkennir að þarna sé bil sem sé óbrúað en hjá ASÍ fengust þau svör að í þessum málum væri engin samræmd stefna innan samtaka stéttarfélaganna, það væri á ábyrgð hvers og eins sjúkrasjóðs fyrir sig að gera tvíhliða samninga við sjúkrasjóði hins opinbera. Ögmundur Jónasson, formaður BSRB segir muninn skýrast af því að sjúkrasjóðirnir séu afar misjafnir að stærð og efnum og búi við misjafnar reglur. Hins vegar væri eðlilegt og æskilegt að sjúkrasjóðirnir gætu haft samstarf, að minnsta kosti um lágmarksaðstoð.

Bæði hjá VR og SFR og eflaust fleiri stéttarfélögum sagði starfsfólk þó að fólki sem lenti svona á milli skips og bryggju þegar það væri að byrja í nýrri vinnu fengi oftast einhverja undanþágu, í einhverja daga, þó það gangi gegn reglunum.