Mótmælendurnir fluttu sig eftir handtökuhótanir

Hátt í 40 mótmælendur sem lokuðu veginum upp að Hraunaveitu á Eyjabakkasvæðinu hafa nú yfirgefið svæðið eftir að lögregla hótaði þeim með handtöku ef þeir færðu sig ekki með góðu. Um fjörutíu manns settust á veginn um hádegisbil og neituðu að færa sig fyrr en um fjögurleytið eftir afskipti lögreglu. Þetta er í fyrsta sinn sem slær í brýnu milli lögreglu og mótmælenda á Vesturöræfum þetta árið.

Í tilkynningu frá mótmælendunum vilja þeir draga athygli að því að framkvæmdir Landsvirkjunar á Eyjabakkasvæðinu séu víðtækari en almenningi hefur verið gerð grein fyrir, því auk Ufsastíflu og Kelduárstíflu sé nú verið að vinna að fleiri litlum stíflum. Auk þess segja mótmælendurnir að bæði Ufsastíflan og Kárahnjúkastíflan séu hærri en gert var ráð fyrir í umhverfismati á sínum tíma, sem hafi í för með sér stærri lón en búið er að gera umhverfismat á.