Síldarævintýrið á Siglufirði 2006

Um verslunarmannahelgina verður Síldarævintýrið á Siglufirði haldið í sextánda sinn. Stefnt er að því að hátíðarhöldin í ár, gefi þeim fyrri ekki neitt eftir, en boðið verður upp á frábært úrval afþreyingar og skemmtiefnis fyrir alla aldurshópa.

Hátíðin er fyrir löngu búin að festa sig í sessi sem stórkostleg fjölskylduhátíð þar sem jafnt ungir sem aldnir og allir þar á milli skemmta sér og öðrum í frábæru umhverfi.Aðgangseyrir á hátíðina er enginn og verð á tjaldstæðum er með því besta sem gerist á landinu en í bænum er fyrsta flokks tjaldaðstaða og fyrirmyndar þjónusta. Mikið er um ókeypis dagskrárliði en einstaka viðburðir eins og dansleikir o.fl. krefjast þó aðgangseyris.

Meðal þess sem Siglufjörður bíður upp á eru, frábærar gönguleiðir, stuttar og langar, t.d. Hvanneyrarskál, Skógræktin, Hólsdalur, Siglunes, Héðinsfjörður o.fl. Góður 9 holu golfvöllur er einnig á svæðinu ásamt sundlaug að ógleymdu einu stórfenglegasta safni evrópu, Síldarminjasafninu. Fjörðurinn státar af mikilli náttúrufegurð og veðursæld er jafnan eins og best verður á kosið þar sem fjöllin fríðu veita skjól frá veðri og vindum.

Löggæsla á hátíðinni verður ströng og munu lögregla og björgunarsveitir vera til taks allan sólarhringinn, einnig er mjög góð heilsugæsla í bænum sem verður í viðbragðsstöðu alla helgina.

Framkvæmdastjóri hefur verið ráðinn Elías Bjarni Ísfjörð sem einnig stóð fyrir skipulagningu hátíðarinnar árið 2005.

Dagskrá helgarinnar er í mótun og mun verða birt von bráðar á vefnum siglo.is auk þess að verður hún gefin út á prenti þegar nær dregur hátíðarhöldum.