Skoðum landið sem hverfur

Náttúruverndarsinnar sem kalla sig Íslandsvini, eru að skipuleggja fjölbreytta tíu daga fjölskyldudagskrá við Snæfell seinni hluta júlí til að kynna fyrir Íslendingum og útlendingum landið sem hverfur undir Hálslón í haust.

Íslandsvinir eru óformleg samtök fólks sem lætur sér annt um landið og vill varðveita það í þeirri mynd sem það er. Helena Stefánsdóttir, Íslandsvinur, segir fjölskyldudagskrána vera tækifæri fyrir almenning að nýta síðasta tækifærið til að berja augum landið sem hverfur undir vatn í haust undir handleiðslu kunnáttumanna og annarra náttúruunnenda.

Dagskráin byrjar með sólarhrings gönguferð inn að Töfrafossi, þar sem gist verður í tjaldi eina nótt. Svo tekur við fjölbreytt dagskrá með fræðslu og afþreyingu fyrir alla aldurshópa, börn sem fullorðna. Auk þess verður tónlist og leiklist gert hátt undir höfði við Snæfell í sumar.

Fyrsta uppákoma Íslandsvina verður skrúðganga og tónlistarhátíð niður Laugaveginn á kosningadaginn 27. maí, með þátttöku margra vinsælustu tónlistarmanna þjóðarinnar.