Ástand baðvatns lakara í fyrra en árin tvö á undan

Ástand baðvatns í sundlaugum og heitum pottum á landinu var slakara í fyrra en árin tvö á undan. Þetta kemur fram í ársskýrslu Umhverfisstofnunar. Þar segir að rannsakaður hafi verið heildargerlafjöldi í 37 stiga heitu vatni í ýmsum sundlaugum og heitum pottum á landinu ásamt hlutfalli kólígerla, sýrustigi og klórmagni. Niðurstöður leiði í ljós að 23 prósent sýna stóðust ekki kröfur baðvatnsreglugerðar. Staðan er þó betri en árin 2001 og 2002 en þá stóðust 28 og 30 prósent sýna ekki kröfur reglugerðarinnar.