Mörður Árnason kominn í 8 manna úrslit

Mörður Árnason tryggði sér fyrr í kvöld sæti í 8 manna úrslitum í spurningaþættinum Meistaranum sem sýndur er á Stöð2. Mörður lagði Stefán Má Halldórsson deildarstjóra hjá Landsvirkjun í skemmtilegri viðureign, sem Logi Bergmann stýrði af röggsemi og viðeigandi léttleika.

 

 

 

Á endanum varð sigur Marðar býsna öruggur. En lokastaðan 17-2 gefur þó ekki til kynna hvernig viðureignin spilaðist því framan af stóð Stéfan Már vel í Merði og hafði meira að segja forystuna eftir fyrstu umferðirnar. En góður endasprettur Marðar gerði gæfumuninn eins og svo oft áður hefur gerst í Meistaranum. Ekki nóg með það heldur tryggði Mörður sér 60 þúsund krónur í beinhörðum peningum þegar hann ákvað að taka stóru áhættuna og leggja yfirburðaforystu sína að veði fyrir eina peningaspurningu, sem hann svaraði svo að sjálfsögðu rétt. Mörður hefur þar með tryggt sér sæti í 8 manna úrslitum eins og áður segir og þokast nær því að verða krýndur Meistarinn og fá þar með 5 milljónir að sigurlaunum.

 

Þeir sem áður höfðu tryggt sér sæti í 8 manna úrslitum eru Erlingur Sigurðsson, sem lagði Ólínu Þorvarðardóttur í síðasta þætti, Steinþór H. Arnsteinsson, sem lagði Björn Guðbrand Jónsson, Kristján Guy Burgess, sem lagði Sævar Helga Bragason, Jónas Örn Helgason, sem lagði Hauk Harðarson og Snorri Sigurðsson sem lagði Önnu Pálu Sverrisdóttur.

Næstsíðasta viðureignin í 16 manna úrslitum fer fram að viku liðinni, fimmtudaginn 23. mars á Stöð 2. Þá mætir Illugi Jökulsson fjölmiðlamaður og Ágúst Örn Gíslason næturvörður á Kleppi.

Lokaviðureignin í 16 manna úrslitum verður svo Inga Þóra Ingvarsdóttir á móti Friðbirni Eiríki Garðarssyni.

 

Frekari upplýsingar um Meistarann

Meistarinn er alvöru spurningaþáttur, "klassískur spurningaþátt," eins og stjórnandi þáttarins, Logi Bergmann hefur orðað það. Fréttaþulurinn Logi Bergmann er hreint enginn aukvisi þegar kemur að því að stýra spurningaþætti en hann var stjórnandi spurningakeppni framhaldsskólanna Gettu betur við góðan orðstír í sjö ár.

Meistarinn er öllum opinn. Markmiðið með þættinum var að leiða saman til spennandi einvígis skörpustu menn og konur landsins; jafnt þau sem þegar eru orðin landsmönnum að góðu kunn fyrir frækna framgöngu í spurningakeppnum, sem og aðra sem til stendur að uppgötva, laða fram á sjónvarsviðið. Allir sem náð hafa 20 aldursárum áttu þess kost að taka þátt. Efnt var til inntökuprófs - "Meistaraprófs" - í nóvember á fjórum stöðum á landinu, í Reykjavík, Egilsstöðum, Akureyri og á Ísafirði og var þáttaka með mesta móti. Þeir hlutskörpustu í prófinu munu mæta til leiks í Meistaranum, ásamt nokkrum af nafntogaðri gáfumönnum og spurningahaukum lansins.

Meistarinn á sér enga fyrirmyndir, er nýr og fjölbreyttur spurningaþáttur fyrir alla fjölskylduna, sem sameina mun allt það besta sem tíðkast hefur í vinsælum spurningaþáttum. Spennan verður í hávegum höfð og mun ekki einasta reyna á þekkingu keppenda heldur ekki síður kænsku þeirra og heppni. Spurningar eru almenns eðlis, um allt og ekkert, allt frá því að vera níþungar í að vera laufléttar. Reynir því ekki einasta á gáfur keppenda heldur ekki hvað síst á kænsku og heppni. Einn mikilvægasti liðurinn í keppninni er nefnilega sá að keppendur þurfa að velja flokka ýmist handa sér eða mótkeppanda sínum. Keppendur þurfa því að spreyta sig á flokkum sem mótkeppandi velur jafnt og hinum ýmsu mynd- og hljóðdæmum. Þurfi keppandi því að hafa heppnina sín megin og leika leikinn að kænsku til að reyna að koma andstæðingum sínum fyrir kattarnef.

Sá sem krýndur verður Meistarinn eftir að hafa lagt alla keppinauta sína í maður-á-mann útsláttarkeppni mun fá að launum 5 milljónir króna í beinhörðum peningum. Í fyrstu umferð sitja tíu manns hjá. Að fyrstu umferð lokinni þurfa þau sextán sem eftir standa að berjast upp á líf og dauða til að komast áfram í næstu umferð, rétt eins og um bikarkeppni sé að ræða.

Meistarinn er á dagskrá á fimmtudögum kl. 20 og þátturinn er endursýndur á laugardögum um kl. 16:00 og mánudögum kl. 22.55. Hægt er að nálgast Meistarann og aðra íslenska þætti sem sýndir eru á Stöð 2, Sirkus, Sýn og NFS á Vísir VefTV.