Segir nám til stúdentsprófs stytt til að spara fé

Ingibjörg Sólrún Gísladóttir, formaður Samfylkingarinnar, segir áform um að stytta námstíma til stúdentsprófs snúast um að spara fé fyrir ríkið og auka miðsstýringu. Hún telur að staldra þurfi við og athuga fremur möguleika á að stytta námstímann í grunnskólanum.

Samfylkingin efndi á laugardaginn til opins fundar um fyrirhugaða styttingu á námstíma til stúdentsprófs í frmahaldskólum úr fjögur ár í þrjú. Á fundinum kom m.a. fram í erindi Jóns Torfa Jónassonar, prófessors í uppeldis- og menntunarfræði við HÍ, að það er ekki alls kostar rétt að íslenskir nemendur ljúki sambærilegum háskólagráðum seinna og skili sér seinna út á vinnumarkaðinn en jafnaldrar þeirra í nágrannalöndunum.

Þessi rök hafa meðal annars verið notuð fyrir styttingu náms til stúdentsprófsins en Ingibjörg Sólrún Gísladóttir,formaður Samfylkingarinnar,segir ljóst að þau haldi ekki vatni.Hún segir umræðu menntamálaráðherra um málið fálmkennda og óljósa og það sé vegna þess að umræðan fari ekki fram á réttum forsendum. Málið snúist einfaldlega um að stytta framhaldsskólann um eitt ár til þess að spara fé hjá ríkinu núna þegar æ stærri hópur ungs fólks komi inn í framhaldsskólana. Það snúist einnig um aukna miðsstýringu og það eigi bara að tala um málið á réttum forsendum, ekki setja málið í felubúning eins og nú sé.

Ingibjörg Sólrún segir aðspurðSamfylkinguna andvíga því að nám í framhaldsskólunum verði stytt en flokkurinn telji hins vegar að hægt sé að stytta nám til stúdentsprófs með því að kenna meira efni á fyrstu árum grunnskólans. Hún vill að staldrað verði við í málinu.Það verði að skoða menntakerfið út frá styrk þess og veikleikum og hvernig allt unga fólkið fái nám við sitt hæfi þannig að hæfileikar þess nýtist sem best. Þá megi ekki rasa um ráð fram með þeim látum sem einkenni vinnubrögð menntamálaráðherra.