Kínversku nýári verður fagnað hérlendis

Kínverjar á Íslandi munu fagna nýári þann 28. janúar með viðeigandi hætti. Þá verður efnt til drekadans niður Laugaveginn en haldið verður frá Hlemmi klukkan tvö síðdegis. Þá gengur í garð "ár rauða hundsins". Þetta er í annað sinn sem efnt er til drekadans hér á landi og það eru Kínversk-íslenska menningarfélagið og Félag Kínverja á Íslandi sem standa fyrir viðburðinum. Félögin vonast til þess að drekadansinn geti orðið árleg hefð hér á landi og leggja þannig áherslu á hið fjölmenningarlega samfélag sem er að festa sig í sessi hérlendis.