Sólveig Pétursdóttir gefur ekki kost á sér

Fulltrúaráð sjálfstæðisfélaganna í Reykjavík kom saman til fundar í Valhöll nú síðdegis og ákvað að halda skyldi sameiginlegt prófkjör helgina 26.-27. október.

Sólveig Pétursdóttir, forseti Alþingis, tilkynnti við það tækifæri að hún ætli ekki að gefa kost á sér til áframhaldandi þingsetu. Sólveig er sú eina af níu þingmönnum Sjálfstæðisflokksins í Reykjavík sem hefur lýst því yfir að hún ætli ekki að bjóða sig fram á ný.

Guðlaugur Þór Þórðarson tilkynnti í morgun að hann ætlaði að bjóða sig fram í annað sæti í prófkjörinu í október, en því sæti sækist Björn Bjarnason, dómsmálaráðherra, einnig eftir - en sá sem nær öðru sætinu mun leiða listann í öðru hvoru Reykjavíkurkjördæmanna svo þar verður keppt um forystuhlutverk.

Illugi Gunnarsson, fyrrum aðstoðarmaður Davíðs Oddssonar tilkynnti í kvöld að hann stefndi á þriðja sætið, en Ásta Möller, sem kom inn á þing þegar Davíð Oddsson hvarf úr stjórnmálum sækist líka eftir því sæti. Birgir Ármannsson býður sig fram í 3.-5. sæti og Pétur Blöndal hefur sagst vilja halda sínu, en ekki gefið upp ákveðið sæti enn. Hann varð í fjórða sæti síðast, en Sigurður Kári Kristjánsson býður sig fram í það sæti nú. Það er því enn sem komið er lítið af nýliðum sem bjóða sig fram og aðeins tvær konur - Ásta Möller og Sigríður Andersen sem sækist eftir 5-7. sæti.