Upptökur klárast á árinu

Önnur plata Orgelkvartettsins Apparat er í vinnslu en óvíst er hvort hún nái að koma út á þessu ári.

„Við erum að semja lög og æfa og ætlum að halda því ferli áfram í ár. Stefnan er að klára að taka hana upp á árinu. Það gerist allt mjög hægt hjá Apparat,“ segir Jóhann Jóhannsson, einn fimm meðlima sveitarinnar.

Eina plata Apparats sem var samnefnd sveitinni til þessa kom út í lok ársins 2002 og fékk mjög góðar viðtökur. Hún kemur út á nýjan leik í Evrópu og í Japan í byrjun maí en hún hefur lengi vel verið með öllu ófáanleg.

Platan var á sínum tíma gefin út í útlöndum af Thule en í þetta skipti munu meðlimir sveitarinnar sjálfir gefa hana út, þar sem þeir eiga nú útgáfuréttin af henni. Ekki er langt síðan hún kom út á nýjan leik hjá 12 Tónum hér á landi.

Til að fylgja plötunni eftir ætlar Apparat í tónleikaferð um Frakkland, Holland, Belgíu og hugsanlega Þýskaland. Hingað til hafa tónleikar sveitarinnar um Evrópu fallið vel í kramið og má búast við því að svipað verði uppi á tengingnum í næstu tónleikaferð þessarar áhugaverðu hljómsveitar.