Rómantík í Hairdoctor

Hljómsveitin Hairdoctor sem að öllu jöfnu er skipuð þeim Jóni Atla Helgasyni og Árna +1 Hlöðverssyni fékk mikinn liðsstyrk á dögunum. Á nýafstöðnum tónleikum hljómsveitarinnar í Þýskalandi voru bakraddirnar í umsjá þeirra Lóu Hlínar Hjálmtýrsdóttur, kærustu Árna, og Gyðu Bergs, kærustu Jóns Atla.

Kærastan mín hafði aldrei sungið í míkrafón áður en kærasta Árna er að vinna að efni með honum sem heitir FM Belfast. Þetta kom mjög vel út, það var mun meiri kynþokki í þessu, segir Jón Atli. Aðspurður hvort að framhald verði á samstarfi með bakraddasöngkonunum segist Jón Atli ekki vita það ennþá. Við erum bara í stúdíói að búa til músík, en þær mega alveg syngja ef þær eru í stuði. Við erum nú samt bara tveir í hljómsveitinni að búa til músík og það var bara hentugt að taka þær með út.

Að sögn Jóns Atla eru breyttar áherslur í tónsmíðum hljómsveitarinnar. Við erum að gera nýja tónlist núna, þetta er svona hressandi elektró og bara miklu meira partý. Það gekk mjög vel á tónleikunum enda fíla Þjóðverjar náttúrlega bassatrommu og teknó, segir Jón Atli.