Óvíst hvort Jónas verji titilinn

Spurningaþátturinn Meistarinn sem sló eftirminnilega í gegn fyrr á árinu verður aftur á dagskrá þegar nýtt ár er runnið upp. Þetta staðfesti spyrillinn Logi Bergman Eiðsson í samtali við Fréttablaðið. „Við höfum verið að ákveða nákvæma dagsetningu en ég reikna með að allt fari á fullt í janúar," segir Logi og því geta spurningakeppnisóðir Íslendingar farið að undirbúa sig af krafti enda til mikils að vinna, fimm milljónir.

Líkt og síðast verður þjóðþekktum einstaklingum boðin þátttaka í þættinum og segir Logi að þeir hafi lagt höfuðið í bleyti um hverjir fá hið eftirsótta boðskort auk þess sem inntökupróf verði haldin fyrir almenning. „Þetta verður mjög svipað form og síðast og það verður forvitnilegt að sjá hverjir koma aftur," segir Logi en þeir fjórir sem komust í undanúrslitin fá sjálfkrafa þátttökurétt.

Þegar Fréttablaðið hafði upp á fyrsta Meistaranum, hinum unga verkfræðinema Jónasi Erni Helgasyni, hafði hann ekki tekið neina ákvörðun um hvort hann hyggðist verja titilinn. Jónas hafði sigur gegn Ingu Dóru Ingvarsdóttur í æsispennandi úrslitaviðureign og fór hann heim með fimm milljónir í beinhörðum peningum. „Ég hef ekki ákveðið neitt, er reyndar ekkert viss um það gerist þótt það yrði óneitanlega spennandi," segir Jónas. „Ég vil í það minnsta ekki þverneita fyrir það," bætir Meistarinn við. Jónas viðurkennir að hafa eytt peningunum misgáfulega, hann hafi ferðast en stærsti hluti vinningsupphæðarinnar var lögð inn á bók þar sem hún ávaxtast hægt og örugglega.

Inga Dóra Ingvarsdóttir sagðist ekki eiga harma að hefna þegar Fréttablaðið náði tali af henni en hún starfar hjá Héraðsdómi Reykjavíkur. „Ég ligg hins vegar undir feldi og er að bræða það með mér hvort ég taki aftur þátt," segir hún. „Hef ekki tekið neina ákvörðun um það," bætir hún við en viðurkenndi að óneitanlega yrði það áhugavert.