Tekist á um hæfi yfirmanna hjá embætti Ríkislögreglustjóra

Lögmenn Baugs fullyrtu í Héraðsdómi í dag að Ríkislögreglustjóri, saksóknari Efnahagsbrotadeildar og yfirlögregluþjónn hefðu allir gert sig ótrúverðuga með yfirlýsingum um sakborninga í Baugsmálinu. Á móti var því haldið fram að fjölmiðlar hefðu snúið út úr orðum embættismanna Ríkislögreglustjóra.

Þess var krafist í héraðsdómi í dag að rannsókn ríkislögreglustjóra á meintum skattsvikum Baugsmanna verði úrskurðuð ólögmæt. Lögmenn þeirra telja yfirmenn hjá embætti ríkislögreglustjóra hafa brotið gegn reglu um að sakborningar teljist saklausir uns sekt er sönnuð.

Meðal annars er vísað í ummæli Haraldar Joannessen ríkislögreglustjóra í Blaðinu á síðasta ári, þar sem hann segir að sá þáttur rannsóknar Baugsmálsins sem beinist að skattamálum muni fara fyrir dóm sem skattsvikamál.

Baugsmenn telja að þarna hafi ríkislögreglustjóri, svo ekki sé um villst, haldið því fram að rannsókninni sem enn er ekki lokið muni lykta með ákæru vegna skattsvika.

Haraldur Johannessen neitað að koma fyrri dóm og gera grein fyrir ummælunum og hérðasdómur felldi þann úrskurð í síðustu viku að honum væri ekki skylt að bera vitni í málinu. Það kom því í hlut Jóns HB Snorrasonar að útskýra fyrir dómi í dag að blaðamaður Blaðsins hafi haft rangt eftir ríkislögreglustjóra. Þrátt fyrir að fjórtán mánuðir séu liðnir frá því ummælin birtust er það fyrst nú sem ástæða þykir til að leiðrétta þau.

,,Það er hægt með rökum að halda því fram að ríkislögreglustjóraembættið sé orðið of innvolverað í þetta mál til þess að geta litið hlutlaust á þær ákvarðanir sem að þarf að taka í málinu."

Það er misskilningur að þessi ummæli ríkislögreglustjóra feli í sér yfirlýsingu um vanhæfi, sagði Jón HB Snorrason. Yfirmenn embættisins geti ekki borið ábyrgð á framsetningu blaðamanna eða þeim hljómi sem fjölmiðlar dragi fram.

Á það einnig við um eftirfarandi ummæli um skattaanga Baugsmálsins sem höfð eru eftir Jóni HB sjálfum í Blaðinu þann 14. nóvember síðastliðinn.

"Menn geta ekki valið Jón eða Gunnu til að stýra rannsókninni og hér fær enginn sérmeðferð, hvort sem hann er snauður eða ríkir og hvort sem hann afgreiðir kjötfars eða ekki."

Gestur Jónsson, verjandi Jóns Ásgeirs Jóhannessonar, segir það ekki hans að taka afstöðu til þess hver sé hæfur til að rannsaka meint skattalagabrot Baugsmanna í stað forsvarsmanna embættis ríkislögreglustjóra.

Það kemur í hlut Eggert Óskarsson héraðdsómara að skera úr um í málinu, eða leggja mat á hæfi rannsakenda.