Litlu stærra en höfuðborgarsvæðið

Helsta átakasvæðið í Líbanon er litlu stærra en Stór-Reykjavíkursvæðið. Íbúar höfuðborgarinnar Beirút fara ekki varhluta af árásunum í suðurhluta landsins, því ekki eru nema um áttatíu kílómetrar þarna á milli.

Frá þrettánda júlí hefur sprengjum rignt yfir Líbanon, þetta litla land við Miðjarðarhafið þar sem rétt tæpar fjórar milljónir búa. Margir gera sér eflaust ekki grein fyrir því hve stutt er á milli staða á svæðinu þar sem helstu átökin hafa staðið. Landið er bara tíu þúsund ferkílómetrar, eða tíu sinnum minna en Ísland og á milli höfuðborgarinnar Beirút og borganna við landamærin að Ísrael eru ekki nema áttatíu til hundrað kílómetrar.

Frá Beirút til landamæranna er álíka langt og frá Mosfellsbæ að Hellu. Enn styttri eru svo vegalengdirnar á milli borganna við landamærin, þar sem mest hefur verið sprengt. Týrus, sem hefur að stórum hluta verið jöfnuð við jörðu er ekki nema rétt um 15 til tuttugu kílómetra frá Beit Jibæl og Kana, þar sem sextíu féllu í gær.