Áverkar sem eiga heima í stríði

Áverkar sem hljótast af ofbeldi í miðborg Reykjavíkur um helgar eiga heima í stríði - ekki í skemmtanalífi. Þetta segir yfirlæknir á slysadeild Landspítalans. Hann vill að fræðsla um ofbeldi og slæmar afleiðingar þess hefjist strax í leikskóla.

Ofbeldi í tengslum við skemmtanahald landsmanna um helgar, og þá sér í lagi í miðborg Reykjavíkur, virðist sífellt verða grófara. Reglulega berast fréttir af hnífsstungum og höfuðspörkum, og um nýliðna helgi var sagt frá manni sem beit eyra af öðrum á Bergstaðastræti. Þá var einn barinn með keðju í höfuðið á Selfossi á föstudagskvöldið, með þeim afleiðingum að hann höfuðkúpubrotnaði.

Ófeigur Tryggvi Þorgeirsson, yfirlæknir slysadeildar Landspítalans í Fossvogi, segir að á þriðja tug manna komi að meðaltali á slysadeildina á laugardagsnóttu með áverka eftir ofbeldi, og það sé óásættanlegt að horfa upp á þetta lengur. Þarna sé um að ræða algjörlega tilefnis- og tilgangslaust ofbeldi.

Ófeigur segir að miðað við þá áverka sem hann sé farinn að sjá í sinni vinnu myndi hann hugsa sig þrisvar um áður en hann fengi sér göngutúr í miðborg Reykjavíkur á laugardagsnóttu. Og hann segir þau áflog sem sjáist á götum úti um helgar á Íslandi líkist óeirðum, og slíkt þekkist ekki í höfuðborgum annarra Evrópuríkja.

Ófeigur vill sjá aukna umræðu um ofbeldisvandamálið í íslensku samfélagi. Það þurfi m.a. að tala um þessa hluti við börnin okkar miklu fyrr, jafnvel strax og þau eru komin á leikskólaaldur. Það þurfi að kenna þeim að bera virðingu fyrir öðru fólki, og þá ekki síst fyrir sjálfu sér.