SA hótar RÚV málssókn vegna innheimtuaðgerða

Samtök atvinnulífsins hóta því að láta reyna á það fyrir dómstólum hvort Ríkisúvarpinu sé heimilt að að krefja fyrirtæki um auknar greiðslur afnotagjalda vegna útvarpstækja í bílum.

Benda samtökin enn fremur á að með þessu fyrirkomulagi á innheimtu útvarpsgjalds sé fyrirtækjum mismunað eftir því í hvers konar rekstri þau eru. Þannig fái hótel sem er með útvarpstæki í hverju hótelherbergi afslátt af útvarpsgjaldi en fyrirtæki sem geri út nokkurn fjölda bifreiða njóti ekki samskonar afsláttar. Megi leiða líkur að því að í þessari framkvæmd felist brot á jafnræðisreglu stjórnsýslulaga.

Þá bendir SA á að samkvæmt óformlegri könnun SA virðist það tilviljunum háð að hvaða fyrirtækjum þessi nýja skattheimta RÚV beinist. Þannig virðist skattheimtan ekki vera almenn heldur eingöngu beinast að fáum útvöldum fyrirtækjum og að auki virðist innheimtan ekki vera í neinu samræmi við fjölda atvinnubifreiða þeirra fyrirtækja sem fyrir henni verða. Slík handahófskennd skattheimta skekki mjög samkeppnisstöðu fyrirtækja á sama markaði og geti ekki talist samræmast góðum stjórnsýsluháttum.

Samtök atvinnulífsins segja að verði skattheimtu RÚV haldið til streitu verði látið reyna á réttmæti hennar fyrir dómsstólum en þar til dómur fáist í málinu verði þeir sem ósáttir eru við innheimtuna að búa við það að greiða afnotagjöldin með fyrirvara um lögmæti þeirra.