Sigurður Demetz er látinn

Sigurður Demetz Franzson, óperusöngvari og söngkennari, andaðist að morgni 7. apríl á hjúkrunarheimilinu Sóltúni í Reykjavík. Hann fæddist 11. október 1912 í St. Úlrik í Grödendal í Ölpunum á landamærum Austurríkis og Ítalíu sem heitir Suður-Tíról, sonur hjónanna Franz og Mariu Demetz.

Sigurður Demetz nam söng á Ítalíu og sönggáfa hans og hæfileikar vöktu athygli tónlistarmanna á borð við dr. Karl Böhm og Herbert von Karajan. Hann söng víða um Evrópu við góðan orðstír, en e.t.v. skein frægðarsól hans skærast þegar hann söng í Scala-óperunni í Mílanó á árunum í kringum 1950.

Sigurður Demetz fluttist hingað til lands frá Ítalíu árið 1955 og hóf söngkennslu víða um land auk þess sem hann söng hér nokkur óperuhlutverk og á tónleikum og stjórnaði kórum. Jafnframt varð hann vinsæll fararstjóri útlendinga í kynnisferðum um landið.

Ýmislegt varð Sigurði Demetz að fótakefli á ferlinum á umbrotatímum í álfunni. Styrjaldir og veikindi öftruðu honum, en hann taldi það gæfu sína að hafa borist til Íslands eins og fyrir guðlega forsjón. Frá því segir hann í ævisögu sinni sem kom út árið 1995.

Sigurður Demetz var sæmdur stórriddarakrossi hinnar íslensku fálkaorðu fyrir störf í þágu söngmenntunar á Íslandi, riddarakrossi ítalska ríkisins og kjörinn heiðursborgari í fæðingarbæ sínum. Hann var verndari Nýja söngskólans Hjartansmáls.

Sigurður Demetz kvæntist Þóreyju Sigríði Þórðardóttur árið 1960. Hún lést árið 1992. Systkini Sigurðar Demetz, öll yngri, eru Ulrike, læknisfrú, Ivo, forstjóri, Franz, listamaður, og Giancarlo, húsvörður, sem er látinn.