Stórverk í vegagerð að hefjast á Vestfjörðum og Norðausturlandi

Vestfirðingar hafa lengi hrópað á vegarbætur og nú þegar búið er að létta af framkvæmdabanni eru að fara þar í gang fjögur stórverk. 25 kílómetra vegagerð um Arnkötludal verður boðin út eftir áramót og nýr vegur um Hrútafjarðarbotn verður einnig boðinn út á næstu vikum. Þverun Mjóafjarðar í Djúpi er þegar kominn í útboð og sömuleiðis vegarbætur syðst í Kollafirði við Skálanes. Þessi fjögur verk munu kosta um þrjá og hálfan milljarð króna og á að ljúka þeim á næstu tveimur árum. Annar landshluti sem ákaft hefur kallað eftir samgöngubótum er norðausturhorn landsins og þar stendur átak einnig fyrir dyrum með þremur stórverkum upp á tvo og hálfan milljarð króna. Upp úr áramótum að bjóða út bæði nýjan Dettifossveg og 30 kílómetra vegarlagningu um svokallaða Hófaskarðsleið. Á hringveginum er þegar búið að bjóða út síðasta malarkaflann á leiðinni milli Akureyrar og Egilsstaða ofan við Skjöldólfsstaði. Nýr Dettifossvegur verður lagður vestan megin við fossinn en ágreiningur um endanlegt vegarstæði, milli Umhverfisstofnunar annars vegar, og Landgræðslu og landeigenda hins vegar, hefur tafið verkið. Búist er við að sveitarstjórn höggvi fljótlega á hnútinn. Útboð Hófaskarðsvegar milli Raufarhafnar og Kópaskers hefur einnig tafist vegna deilumála, en þar stefnir Vegagerðin að eignarnámi. Íbúar á Raufarhöfn og Þórshöfn munu með þessari vegagerð sjá fram á að tengjast öðrum landshlutum með bundnu slitlagi. Verkefnin sem framundan eru á Vestfjörðum munu einnig þýða að unnt verður að aka milli Ísafjarðar og Reykjavíkur á bundnu slitlagi, væntanlega eftir tvö ár. Þar á að byggja tignarlega stálbogabrú yfir Mjóafjörð í Ísafjarðardjúpi, leggja veg yfir Reykjafjörð við Reykjanes og yfir Vatnsfjarðarháls. Þannig styttist vetrarleiðin milli Ísafjarðar og Reykjavíkur um 33 kílómetra. Vegarlagning um Arnkötludal milli Steingrímsfjarðar og Gilsfjarðar mun einnig stytta heilsársleiðina milli Ísafjarðar og Reykjavíkur verulega eða um fjörutíu kílómetra.