Lýstu eftir horfnum félaga í tapað-fundið

Ekki er heiglum hent að vera ástfanginn og eiga hrekkjalóma fyrir vini en því kynntist Elvar Freyr Helgason. Í smáuglýsingu í Fréttablaðinu sem birtist á mánudag lýstu þrír vinir eftir Elvari og segja hann hafa tapað sér í sambandssýki. Vilja félagarnir endilega að fólk láti vita ef það heyrir í honum. "Því við gerum það ekki," stendur í auglýsingunni sem birtist undir flokknum "Tapað-fundið".

"Þetta var bara sakleysislegur hrekkur," segir Guðmundur Auðunsson, forsprakki vinahópsins sem ábyrgur er fyrir þessari skemmtilegu auglýsingu. "Við höfðum bara ekki séð hann svo lengi að við ákváðum að lýsa eftir honum," bætir Guðmundur við og hlær. "Við hittumst um helgina og Elvar átti að mæta en þegar hann mætti ekki reyndum við að hringja. Við náðum engu sambandi og ákváðum að gera þetta í flýti," útskýrir Guðmundur og segir að þeir hafi vandað sig vel við að velja verstu myndina sem þeir ættu af félaga sínum.

Vinirnir gættu þess þó að öruggt væri að fólk misskildi ekki auglýsinguna og færi að halda að Elvar væri í vanda staddur, hann hefði bara ekki sést meðal vina. "Mér skilst að það hafi mikið verið hringt í hann, meðal annars amma hans og afi og foreldrarnir sem hlógu mikið að þessum grikk," segir Guðmundur sem bjóst alls ekki við að auglýsingin yrði birt, hvað þá að hún myndi vekja svona mikla athygli.

Að sögn Guðmundar fór Elvar strax heim úr vinnunni og tékkaði á auglýsingunni þegar símtölunum linnti ekki. "Hann áttaði sig strax á því hverjir þetta væru, hringdi í mig og skellti upp úr, tók þessu ákaflega létt," segir Guðmundur. Hann tekur hins vegar skýrt fram að þessum litla hrekk sé ekki beint gegn kærustu Elvars, hún sé yndisleg stelpa. "Smáauglýsingin virkaði hins vegar því við erum búnir að ákveða að hittast sem fyrst," segir Guðmundur.