Það hafa allir skoðun á starfi veðurfréttamanna

Óvenjumikil endurnýjun hefur verið í stétt veðurfréttamanna að undanförnu. Tvö ný andlit hafa birst á sjónvarpsskjám landsmanna sem heyrir til tíðinda þar á bæ. Báðir nýliðarnir eru 29 ára gamlir, þau Soffía Sveinsdóttir á Stöð 2 og Hálfdán Ágústsson í Sjónvarpinu.

"Ég get viðurkennt það að ég hefði ekki trúað því fyrir tveimur mánuðum að ég ætti eftir að lesa veðurfréttir í sjónvarpinu," segir Soffía sem kann vel við sig í nýja starfinu. Hún er efnafræðingur að mennt og starfar sem kennari í Menntaskólanum við Hamrahlíð. Soffía birtist fyrst á sjónvarpsskjánum í hádegisfréttum fyrir þremur vikum síðan en um síðustu helgi steig hún skrefið til fulls og las veðurfréttir í kvöldfréttatímanum.

"Já, ég hef áhuga á veðurfræði og hann fer vaxandi nú þegar maður fer að garfast í þessu. Bakgrunnur minn úr náminu nýtist líka ágætlega," segir Soffía sem er einhleyp og barnlaus. Hún segist alveg vera til í að starfa áfram sem veðurfréttamaður. "Þetta er nú bara aukavinna enn sem komið er en það er aldrei að vita."

"Ég held að þetta hafi bara gengið ágætlega. Ég var búinn að æfa mig aðeins en var samt pínu stressaður. Þetta kemur væntanlega með æfingunni," segir Hálfdán Ágústsson, nýliðinn á RÚV, sem birtist landsmönnum á skjánum í fyrsta skipti síðasta föstudagskvöld. Hálfdán er í doktorsnámi í veðurfræði, í læri hjá sjálfum Haraldi Ólafssyni, og rannsakar vindhviður í fjalllendi. "Þetta er skemmtilegt nám. Við erum samt ekkert margir í doktorsnáminu, kannski tveir eða þrír," segir hinn 29 ára gamli og lofaði Hálfdán.

Hann gerir sér vel grein fyrir því að Íslendingar eru afar áhugasamir um veður og veðurfregnir og hafa skoðanir á málunum. "Við erum greinilega milli tannanna á fólki. Það sést vel þegar tónlistarmenn eru farnir að semja lög um okkur," segir Hálfdán og vísar í nýlegt lag Bogomil Font og Flísar, Veðurfræðingar ljúga. "Það hafa allir skoðun á þessu," segir Hálfdán.