Tvöfalt frá Mannakornum

Hljómsveitin Mannakorn gefur út plötuna Ekki dauðir enn á næstunni. Á plötunni, sem tvöföld, eru upptökur frá þrjátíu ára afmælistónleikum sveitarinnar í Salnum í Kópavogi þar sem fjögurra manna strengjasveit var henni til halds og trausts. Bæði eru gömul og ný lög með Mannakornum á plötunni. Þetta er fyrsta platan sem Sögur útgáfa gefur út.

Við héldum þrenna afmælistónleika í Salnum og það var uppselt á þá alla okkur til mikillar ánægju, segir Magnús Eiríksson. Við útsettum svolítið af þessum lögum fyrir strengi og þegar við fórum að hlusta fannst okkur þær mjög skemmtilegar og ákváðum að dúndra þeim út, segir hann.

Mannakorn stefna að því að spila eitthvað á næstunni, auk þess sem ný plata er í vinnslu. Sú síðasta, Betra en best, fékk mjög góðar viðtökur og mun vera uppseld.