Sveitamarkaður í sláturhúsi

Í sumar verður starfræktur sveitamarkaður í gamla sláturhúsinu við Laxá í Leirársveit. Markaðurinn verður opinn alla sunnudaga í sumar frá kl. 13-18. Fyrsti opnunardagur er um helgina en hann lendir reyndar á laugardegi.

Í fyrra var haldinn markaðsdagur í sláturhúsinu og þá var klikkað að gera enda stendur húsið á mjög góðum stað, alveg við þjóðveginn, segir Jóhanna Harðardóttir sem hefur umsjón með markaðnum. Húsnæðið hefur staðið autt síðan hætt var að nýta það sem sláturhús fyrir nokkrum árum en í sumar lifnar heldur betur yfir staðnum.

Boðið verður upp á ýmsar vörur á sveitamarkaðinum sem allar eiga það sameiginlegt að vera heimatilbúnar. Mikið verður um allskonar handverk og listmuni og einnig verður hægt að kaupa ýmiskonar matvæli beint frá bóndanum eins og brodd, sultu, egg, reyktan fisk, grænmeti og heimabakað brauð og kökur. Huggulegt kaffihús verður einnig starfrækt á staðnum þegar markaðurinn er opinn og þar verður t.d. boðið upp á heimagerðan ís frá Holtsseli í Eyjafirði.

Húsnæðið sem markaðurinn er með til afnota telur nærri 400 fm svo það er nægt pláss fyrir handverksfólk og bændur sem vilja selja afurðir sínar á staðnum. Sjálf ætlar Jóhanna að selja útskorin drykkjarhorn og egg úr landnámshænum og hvetur hún alla þá sem eru á ferðinni á milli Reykjavíkur og Borgarness að stoppa á markaðnum, kíkja á úrvalið og fá sér kaffisopa.