Spánn

Spánverjar eru í H riðli með Úkraínumönnum, Túnisum og Sádí - Aröbum. Þeir eru sigurstranglegasta liðið í riðlinum eins og venjan er með spænsk lið. Spánn eru í fimmta sæti á styrkleikalista FIFA.

Spánverjar komast nær undantekningalaust í lokakeppnina og eru oft með frábæran árangur fram að HM. Svo klikkar eitthvað þegar á hólminn er komið. Þeir eru nú búnir að bæta líkamsstyrk við þá hæfileika sem búa í liðinu. Verður það nóg til komast hjá enn einum vonbrigðunum?

Luis Aragones þjálfari liðsins er gamall refur í boltanum. Hann er búinn að vera lengi að og skilar iðulega árangri þar sem hann staldrar við. Spánverjar hafa ekki tapað leik síðan hann tók við í júlí 2004.

Fernando Morientes leikmaður Liverpool hlaut ekki náð fyrir augum Aragones og heldur ekki Ruben Baraja leikmaður Valencia. Hins vegar er urmull af leikmönnum sem leika á Englandi í hópnum eða sex talsins sem er óvenjulegt fyrir spænskt landslið.

Spænski gulldrengurinn Raul, leikmaður Real Madrid, verður að teljast aðalmaðurinn í liðinu. Þó að hann sé að ná sér af meiðslum og hafi aldrei skorað jafn lítið á ferlinum eins og í vetur þá gæti hvíldin komið honum til góða.

Fyrirliði: Raul

Lykilmaður: Raul

Gætu slegið í gegn: Francesc Fabregas og Fernando Torres