Margrét Frímannsdóttir var hundsuð sem formaður af meirihluta þingflokks Alþýðubandalagsins

Margrét Frímannsdóttir, fyrrverandi formaður Alþýðubandalagsins, segir í nýútkominni bók, að meirihluti þingflokks Alþýðubandalagsins hafi á sínum tíma kosið sér annan formann og hundsað hana á þingflokksfundum.

Hún lýsir því hvernig flokkurinn var margklofinn en segir sömu stöðu ekki vera uppi innan Samfylkingarinnar nú á milli stuðningsmanna Össurar Skarphéðissonar annars vegar og Ingibjargar Sólrúnar Gísladóttur hins vegar.

Í bókinni "Stelpan frá Stokkseyri" eftir Þórunni Hrefnu Sigurjónsdóttur, er sviftingum í einka- og stjórnmálalífi Margrétar Frímannsdóttur lýst. Margrét segir frá því sem hún kallar karlaveldið á Alþingi og ekki hvað síst innan þingflokks Alþýðubandalagsins, þar sem karlarnir hafi vanist því að ná sínu fram án tillits til þess sem konur innan þingflokksins sögðu og vildu. Árið 1995 gat Ólafur Ragnar Grímsson ekki setið lengur sem formaður samkvæmt reglum flokksins um kjörtímabil formanns. Margrét lýsir því hvernig meirihluti þingflokksins hafi gengið út frá því vísu að Steingrímur J Sigfússon yrði næsti formaður flokksins. Margrét sigraði Steingrím hins vegar í formannskjöri, þar sem allir flokksmenn höfðu kosningarétt, með 53,5 prósentum atkvæða. Eftir að Margrét var kosin lýsir hún köldu andrúmslofti innan þingflokksins, þar sem mikill meirihluti hans hafi í raun hundsað hana sem formann. Hún hafi því farið með öll sín stefnumál til miðstjórnar, framkvæmdastjórnar og landsfunda.

"Og þingflokkurinn varð auðvitað, þegar gerðar höfðu verið samþykktir á landsfundum eða á miðstjórnarfundum, að fara eftir þeim," segir Margrét. Hún segir ekki fara á milli mála að meirihluti þingflokksins hafi hundsað hana sem formann. Innan þingflokksins hafi verið þingmenn sem sem höfðu kosið sér annan formann, mann sem ekki hefði náð kosningu, en stór hluti þingflokksins hafi engu að síður litið á sem formann flokksins.

Margrét segir ekki hægt að heimfæra þessa stöðu hennar innan þingflokks Alþýðubandalagsins við stöðu formanns Samfylkingarinnar nú,  vegna meintra armaskiptinga stuðningsfólks Össurar Skarphéðinssonar og Ingibjargar Sólrúnar Gísladóttur, sem tókust á í formannsslag.

"Nú vinna þau sem teymi fyrir flokkinn, hann sem þingflokksformaður og hún sem formaður og ég fullyrði að þingmenn sýna þeim báðum fullan trúnað," segir Margrét Frímannsdóttir.