Lífið

Eiríkur afhendir heiðursverðlaun Gullkindar

Kynnirinn segir að Soffía, eiginkona sín, verði á staðnum og þurfi því ekki að hafa áhyggjur af of nánum kynnum hans og Unnar Birnu.
Kynnirinn segir að Soffía, eiginkona sín, verði á staðnum og þurfi því ekki að hafa áhyggjur af of nánum kynnum hans og Unnar Birnu.
Í kvöld verður Gullkindin, skammarverðlaunahátíð skemmtanaiðnaðarins, haldin á Klassík Rokk. Mikil spenna er í tengslum við hver hreppir hvaða verðlaun, ekki síst heiðursverðlaunin. Samkvæmt heimildum Fréttablaðsins eru nokkrir sem koma til greina og má þar nefna þá Árna Johnsen, Runólf Ágústsson, fyrrv. rektor, Einar Ágúst söngvara og Harald Johannessen ríkislögreglustjóra.

Andri Freyr Viðarsson, sem hefur með framkvæmd Gullkindarinnar að gera, harðneitar eðlilega að gefa upp hver hlýtur þau.

„Þetta eru einu verðlaunin sem má túlka sem jákvæð. Af þeim öllum. Heiðursverðlaunin. Í fyrra fékk Eiríkur Jónsson blaðamaður þau og þá var hann búinn að fá alla þjóðina upp á móti sér.“

Eiríkur Jónsson afhendir heiðursverðlaunin en hann hlaut þau einmitt í fyrra.
Og það verður einmitt Eiríkur sem afhendir heiðursverðlaunin, alveg ófeiminn við að mæta. „Hann sagði að það væri í góðu lagi svo framarlega sem við dræpum hann ekki.“

Líkt og Fréttablaðið greindi frá í gær verður kynnir Stjáni 3000, betur þekktur sem Stjáni Stuð, ásamt alheimsfegurðardrottningunni Unni Birnu. Kvöldið leggst vel í kappann. „Ég hef nú kynnt hlustendaverðlaun X-ins. Nei, nei, ekkert stressaður. Ég verð ánægður ef ég fæ dagskrána klukkan hálf sex. Þá læri ég þetta. Ef ég fæ dagskrána ekki fyrr en átta, þá verð ég stressaður.“

Stjáni er ánægður með samkynni sinn og segir að þau muni stilla saman strengi sína. Hann harðneitar því að Soffía eiginkona sín hafi af sér áhyggjur í svo heillandi félagsskap.

„Nei, nei, hún er komin með smá vinnu í tengslum við hátíðina. Hún verður baksviðs og skammtar bjóra fyrir hina gestina. Þetta verður söguleg stund. Og ég verð með grín inn á milli kynninga.“






Fleiri fréttir

Sjá meira


×


Tarot dagsins

Dragðu spil og sjáðu hvaða spádóm það geymir.