Bradley heiðraður

George W. Bush, forseti Bandaríkjanna, gaf út yfirlýsingu eftir að fréttamaðurinn Ed Bradley dó þar sem hann heiðraði hann með því að segja hann „einn færasta blaðamann okkar tíma". Bradley lést á fimmtudag eftir harða baráttu við hvítblæði.

Fleiri þekkt nöfn hafa tjáð sig um dauða Bradley, þar á meðal Walter Cronkite, fyrrum fréttamaður CBS. „Bradley var grimmur í viðtölum og lagði hart að sér til að fá viðtöl," sagði hann. „Um leið og viðtalinu var lokið, eftir að viðmælandinn hafði fengið mikla útreið hjá honum, skildu þeir sem vinir. Hann var þannig náungi."

Bradley, sem var mikill djass-áhugamaður, gekk árið 1971 til liðs við CBS-sjónvarpsstöðina og tíu árum síðar komst hann inn í 60 mínútur, þar sem hann átti eftir að hafa mikil áhrif.