Allt búið hjá Jude og Siennu

Svo virðist sem allt sé búið milli Siennu Miller og Judes Law, eða hvað? Fjölmiðlar hafa ekki getað treyst einni einustu frétt af parinu sem hefur verið sundur og saman síðastliðið ár og fáum kæmi það á óvart ef skötuhjúin birtust á næstu dögum með þá yfirlýsingu að allt væri í himnalagi.

Slúðurblaðið People hefur eftir nánum vinum hjónaleysannna að þau hafi fengið nóg af hvort öðru en ákvörðunin hafi verið tekin í sameiningu. „Þau hafa reynt að láta þetta ganga en mistekist. Bæði Jude og Siennu líður illa yfir þessu en halda að þetta sé þeim fyrir bestu,“ sagði vinurinn í samtali við blaðið. Talsmenn parsins vilja ekkert tjá sig um það en vinahópurinn í kringum þau virðist sannfærður um að öllu sé lokið. „Börnin skipta Jude mestu máli og það fer illa í Siennu,“ er haft eftir nánum vini leikkonunnar.

Sienna og Jude slitu sambúðinni eftir að bresku blöðin birtu fréttir af ástarsambandi hans og barnfóstru barna hans og Sadie Frost. Þau náðu síðan aftur saman en voru fljót að skilja eftir að sömu blöð komust á snoðir um einnar nætur gaman Miller og Daniels Craig. Parið ákvað síðan að reyna að blása nýju lífi í glæðurnar og vonuðust fjölskyldur þeirra beggja að hið versta væri yfirstaðið en sá draumur varð ekki að veruleika... í bili.