Segist vera í Spice Girls

Fótboltafrúin og fyrrverandi kryddstúlkan Victoria Beckham segist hafa sagt sonum sínum að hún væri ennþá í stúlknasveitinni Spice Girls. Victoria segir að synirnir þrír hafi ekki haft hugmynd um hvað mamma gerði áður en hún átti þá svo hún ákvað að sýna þeim kvikmyndina Spice Girls: The movie.

„Ég ákvað að sýna þeim myndina því á Spáni snýst allt um David Beckham og fótboltann. Þeir voru farnir að spyrja mig, hvað ég hefði gert áður en þeir fæddust," sagði Victoria í útvarpsviðtali. Brooklyn, Romeo og Cruz Beckham voru svo hrifnir af myndinni að Victoria hafði ekki brjóst í sér að segja þeim að hljómsveitin væri hætt.

En þrátt fyrir þessi ósannindi segir Victoria að það séu mjög litlar líkur á því að stúlknasveitin vinsæla komi saman á ný.