Tónleikahaldari sest í bæjarstjórastól

Grímur Atlason, þroskaþjálfi og tónleikahaldari með meiru, er ný­ráðinn bæjarstjóri í Bolungarvík. Grímur hefur um árabil verið búsettur í Vesturbænum í Reykjavík ásamt konu sinni Helgu Völu Helgadóttur, leik- og fjölmiðlakonu.

Ég hef aldrei verið feiminn við breytingar og þetta er mikið tækifæri fyrir mig. Fólkið í Bolungarvík hefur verið að bíða eftir göngum og þess háttar en ég tel að það séu mjög bjartir og öflugir tímar framundan hjá okkur, segir Grímur.

Grímur og Helga Vala eiga fjögur börn, tvö saman og sitthvora stelpuna úr fyrri sambúð. Við förum vestur þessi fjögurra manna kjarni en stofnum svo til heimilis fyrir okkur öll sex í Bolungarvík, segir Grímur. Helga Vala verður svo með annan fótinn í Reykjavík til að byrja með, þar sem hún er í lögfræði í HR, en mun síðan stunda fjarnám eins og kostur gefst.

Grímur og Helga Vala hafa búið í Vesturbænum um árabil en bæjarstjórinn nýráðinn segist ekki vita hvað framtíðin beri í skauti sér. 101 er ekki nafli alheimsins og það er ótrúlega margt sem gerist þar fyrir utan. Við eigum yndislega íbúð í Vesturbænum sem við vorum lengi að finna en það er algjör óþarfi að rjúka til og selja hana. Kannski komum við samt aldrei aftur en það verður bara að koma í ljós. Við erum allavega ekki að fara til að vera í tvo mánuði, segir Grímur.

Grímur er ekki tengdur Bolungarvík á neinn hátt en á þó ættir sínar að rekja til Vestfjarða. Afi Gríms, Grímur Jónsson, byggði jörðina Súðavík og átti meðal annars frystihúsið þar í bæ. Í aðra ættina er ég Vestfirðingur en í hina frá Raufarhöfn. Þetta eru tvö helstu menningarsvæði landsins, segir Grímur stoltur, en hann hefur ekki látið sitt eftir liggja í menningarmálum landsbyggðarinnar og hélt meðal annars tónleika með Emilíönu Torrini í Bolungarvík fyrir nokkru.

Grímur hefur verið einn ötulasti tónleikahaldari landsins undanfarin ár en býst við að það dragi nokkuð úr því þar sem hann er kominn í nýtt starf. Tónleikahaldið er ótryggur bransi og ætli það sé ekki með mig eins og fólkið fyrir vestan að efnahagsstjórnun landsins fer ekki vel með okkur því sveiflurnar eru svo miklar, segir bæjarstjórinn í Bolungarvík.