Sjóræningjarnir slá Kóngulóarmanni við

Framhaldsmynd Pirates of the Caribbean, Dead Man's Chest, sló öll met um opnunarhelgina í Bandaríkjunum. Myndin halaði inn 132 milljónum dollara um síðustu helgi og sló þar með metið sem Spider-Man setti árið 2002. Upphæð opnunarhelgarinnar er þrisvar sinnum hærri en sú sem fyrsta myndin í seríunni aflaði fyrir tveimur árum.

"Þegar fólkið í bransanum spáði því að við myndum ná 100 milljónum dollara hélt ég að það væri bara að reyna að vera andstyggilegt. Sama hversu vel okkur gengi yrði þetta misheppnð ef við fengjum þessa upphæð. Ég hélt að þau væru að grínast og grunaði aldrei að tölurnar yrðu svona háar," sagði Jerry Bruckheimer, framleiðandi myndanna.

Í ofanálag sló kvikmyndin metið á föstudeginum einum og á hún er sú fyrsta til að hala inn hundrað milljónum dollara á einum degi. Næstar á lista yfir mestsóttu myndirnar eru Superman Returns og tískugrínmyndin The devil wears Prada. The curse of the black pearl, fyrsta myndin um sjóræningjana, naut mikilla vinsælda sem þó voru ekkert í líkingu við framhaldsmyndina.

Johnny Depp fékk Óskars tilnefningu fyrir leik sinn í myndinni og greinilegt er að myndin fellur í kramið hjá áhorfendum þrátt fyrir að framleiðendur myndarinnar hafi ekki litist vel á Depp í upphafi.