Fréttir af fólki

Denise Richards ætlar að selja húsið sitt til að forðast fyrrverandi bestu vinkonu sína Heather Locklear. Richards á í ástarsambandi við gítarleikarann Richi Sambora úr Bon Jovi, en hann er fyrrum eiginmaður Heather Locklear. Richards hefur því ákveðið að setja sex herbergja húsið sitt til söluna, en það er við hliðina á húsinu hennar Locklear. Leikkonan, sem lék meðal annars í myndinni Wild Thing, ætlar að flytja til Los Angeles með dætur sínum tveimur sem hún á með leikaranum og kynlífsfíklinum Charlie Sheen.

 

Leikkonan Pamela Anderson er komin með nýjan mann upp á arminn ef marka má bresku pressuna. Pamela sást í kossaflensi við breska sjónvarpsþáttastjórnandann Steve Jones þegar hún var úti á lífinu í London fyrir skömmu. Parið, sem átti víst í stuttu ástarsambandi árið 2004 eftir að Steve tók viðtal við hana, á að hafa eytt nótt saman þegar dýraverdnunarsamtökin PETA veittu verðlaun á miðvikudaginn var. Pamela og Steve eyddu fyrst nokkrum klukkustundum saman heima hjá vini Pamelu áður en þau tóku til við villta skemmtun á heitustu skemmtistöðum London.

Svo gæti farið að Pierce Brosnan feti í fótspor Sir Sean Connery og taki að sér hlutverk í nýrri mynd framleidda af Kevin McClory. Brosnan, sem missti stöðuna sem leyniþjónustumaðurinn 007 í fyrra, er talinn líklegastur til að hreppa hlutverkið í nýrri Bond-mynd sem framleiðandinn McClory ætlar að framleiða. McClory er sá sami og framleiddi Bond myndina Never Say Never Again en hann á kvikmyndaréttinn á Bond-myndinni Thunderball frá árinu 1965. Bond mynd McClory mun væntanlega keppa um hylli áhorfenda við Bond-myndina Casino Royal með Daniel Craig í aðalhlutverki.