Tískuvikan í Mílanó fer vel af stað

Þessa stundina stendur tískuvika yfir í Mílanó. Helstu hönnuðir heims eru samankomnir í tískuborginni til að sýna herrafatnað fyrir vor/sumar "07.

Kannski er ótímabært að fjalla um næsta sumar þegar þetta er varla byrjað en fatahönnuðir eru vanir að vinna eitt ár fram í tímann og er því eins gott að vera með frjóa hugsun.

Hönnuðir á borð við Miuccia Prada, Gianni Versace, Alexander McQueen og Antonio Marras voru meðal þeirra hönnuða sem sýndu listir sínar og samkvæmt þeim verður herratískan bæði litaglaðari og tilraunakenndari næsta sumar. Stuttbuxur, síðir frakkar og axlabönd koma fram hjá mörgum hönnuðum. Ljósgrár og ljósbrúnn voru allsráðandi í bland við æpandi skæra liti á borð við bleikan, gulan og fjólubláan. Buxurnar eru að verða víðari aftur og fóru margir hönnuðir aftur í tímann með tvíhnepptum jökkum og axlaböndum.