Rose laus úr haldi

Axl Rose, söngvari rokksveitarinnar Guns N"Roses, hefur verið sektaður eftir að hafa játað sig sekan um að hafa ráðist á öryggisvörð og framið skemmdarverk á hóteli í Stokkhólmi.

Honum hefur nú verið sleppt úr haldi lögreglu en þarf að borga um hálfa milljón króna í sekt fyrir skemmdarverkin. Hann þarf einnig að borga um 120 þúsund krónur í skaðabætur eftir að hafa bitið öryggisvörð á hótelinu í fótinn.

Að sögn sænsku lögreglunnar var Rose, sem er 44 ára, of fullur til að tala við lögregluna þegar hann var handsamaður. Rose er eini upphaflegi meðlimur Guns N"Roses sem enn leikur með sveitinni. Hljómsveitin sló í gegn á níunda áratugnum með lögum á borð við Welcome to the Jungle, Paradise City og Sweet Child O"Mine.