Skáld framtíðarinnar

Árlegri ritsmiðju barna lauk í gær í Kringlusafni og var mætingin góð að sögn Hildar Baldursdóttur barnabókavarðar Kringlusafnins. "Það mættu 17 börn í gær, ásamt foreldrum og öðrum aðstandendum, sem hlýddu á þau lesa upp úr frumsömdum ljóðum og sögum sem Herdís Egilsdóttir, kennari og rithöfundur, aðstoðaði þau við að setja saman. Á hverju ári fáum við rithöfund til að leiðbeina börnunum og það er gaman að fylgjast með því hversu ólík áhersla þeirra er við tilsögnina."

Hildur segir stórkostlegt hafa verið að hlýða á krakkana og bætir við að þarna séu eflaust á ferð framúrskarandi skáld og rithöfundar framtíðarinnar. "Á Íslandi erum við einstaklega heppin þar sem starfandi rithöfundar eru tilbúnir að verja tíma sínum í ritsmiðju með börnunum".

Auk ritsmiðjunnar var lestrarmaraþoni Borgarbókasafnsins þjófstartað en það hefst formlega á mánudag. "Það gengur þannig fyrir sig að bæði börn og fullorðnir skrá sig í keppnina um leið og fólk skilar inn bók sem það hefur verið að lesa og fær í leiðinni afhenta þar til gerða þátttökuseðla. Því fleiri seðlum sem það safnar, því meiri möguleikar eru á því að vinna," segir Hildur. Keppnin stendur yfir fram á Menningarnótt en þá verður uppskeruhátíð þar sem heppnir þátttakendur verða dregnir út og veitt verða vegleg verðlaun.